Nega bu muhim
Loyiha elektr va energiya tejamkor texnikalar ishlab chiqarishni mahalliylashtirishga xizmat qiladi. Ushbu tashabbus EIZlarni rivojlantirish va yangi ish o‘rinlarini yaratishga turtki beradi.
Nima bo‘ldi
- Investitsiya loyihasi Samarqand viloyatining Oqdaryo tumanida amalga oshirilmoqda.
- Birinchi navbat (16,5 mln dollar) doirasida 40 ga yaqin ish o‘rni yaratiladi.
Mahsulotlar:
- g‘ildiraklar soni turlicha bo‘lgan elektr samokatlar;
- quyosh panellari o‘rnatilgan ko‘cha chiroqlari;
- alkogolsiz ichimliklar va kir yuvish kukunlari.
Viloyat hokimi Adiz Boboyev tezkorlik bilan kirish yo‘lini ta’minlashga va’da berdi. Kompaniya 2024-yil oktyabr oyida ro‘yxatdan o‘tgan. Ta’sischisi — Yuan Dunshen (XXR), direktori — Aziz Xolmuradov. Shu bilan birga, investor bojxona sohasida ishlash uchun ikkinchi kompaniya — Yaxing Guoji Jin Chukou Daili’ni ro‘yxatdan o‘tkazdi.
Mohiyat
Ikkala kompaniyaning ustav kapitali 1 mln so‘mni tashkil etadi. Yaxing Guoji Maoyi dastlab qishloq xo‘jaligi mahsulotlarini qayta ishlash sohasida ishlash niyatida ekanligini ma’lum qilgan. Ishlab chiqarishni joylashtirish uchun “Urgut” EIZ yaqinidagi uchastka tanlandi, u yerda rasmiylar qo‘shimcha yordam ko‘rsatishga tayyor.
