Nega bu muhim
Germaniyada savdo uyining ochilishi O‘zbekiston tovarlarining Yevropa bozoridagi ishtirokini kengaytiradi, eksportning o‘sishiga, investitsiyalarni jalb qilishga va O‘zbekiston va GFR o‘rtasidagi ishbilarmonlik aloqalarini rivojlantirishga yordam beradi.
Nima bo‘ldi
- Savdo-sanoat palatasi Berlinda O‘zbekistonning birinchi rasmiy savdo uyini ochdi.
- 2-dekabr kuni UZ Trade House Germany’ning ochilish marosimi bo‘lib o‘tdi.
- Tadbirda SSP, O‘zbekistonning Germaniyadagi elchixonasi vakillari va germaniyalik tadbirkorlar ishtirok etdi.
- Savdo uyi Berlin markazidagi Adlon mehmonxonasi binosida, Brandenburg darvozasi qarshisida joylashgan.
- Savdo uyida O‘zbekistondan keltirilgan to‘qimachilik, qishloq xo‘jaligi, oziq-ovqat, elektrotexnika va boshqa mahsulotlar namoyish etilmoqda.
Raqamlar va faktlar
- Yangi savdo uyi Savdo-sanoat palatasining Germaniyadagi rasmiy vakolatxonasi bo‘ladi.
- Marosim doirasida O‘zbekistonning savdo-iqtisodiy va turizm salohiyati taqdimoti o‘tkazildi.
- Savdo uyidan ikki mamlakat ishbilarmon doiralari o‘rtasida aloqa o‘rnatish uchun maydon sifatida foydalaniladi.
- O‘zbekiston biznesi Germaniya investitsiyalari va texnologiyalarini jalb qilish uchun qo‘shimcha imkoniyatlarga ega bo‘ladi.
Mohiyat
- Xorijdagi savdo uylari milliy mahsulotlarni ilgari surish, xorijiy hamkorlar bilan to‘g‘ridan-to‘g‘ri aloqalarni o‘rnatish va Made in Uzbekistan brendining tanilishini oshirish uchun ishlatiladi.
- Germaniya O‘zbekistonning Yevropadagi asosiy savdo-iqtisodiy sheriklaridan biridir.
