Nega bu muhim
Boshqaruvni xorijiy klinikalarga berish sog‘liqni saqlash tizimini isloh qilishning bir qismidir. Sifat yaxshilanishi, navbatlar kamayishi va xalqaro standartlar joriy etilishi kutilmoqda.
Nima bo‘ldi
- Mirziyoyev 19-sentyabr kuni sog‘liqni saqlash tizimini isloh qilish bo‘yicha hisobot bilan tanishdi.
- 5 ta tibbiyot markaziga xorijiy professional menejerlarni jalb qilish bo‘yicha qaror qabul qilindi.
- Muvaffaqiyatli misol sifatida turkiyalik mutaxassislar ishlaydigan Onkologiya va radiologiya markazi ko‘rsatilgan.
Ishlab chiqilmoqda:
- diagnostika va davolash standartlari,
- yangi klinik protokollar,
- Osiyo taraqqiyot banki ko‘magida 3 mingta tibbiy xizmat uchun tariflar metodologiyasi.
Natijaga qarab shifokorlarni rag‘batlantirish tizimi joriy etiladi. Oilaviy shifokorlar ulushini 70 foizga yetkazish kerak, raqamlashtirish natijasida xodimlar ish hajmi uchdan birga qisqaradi.
Mohiyat
Mamlakatda o‘nlab respublika ilmiy-amaliy tibbiyot markazlari faoliyat ko‘rsatayotgan bo‘lsa-da, ularning ishidan qoniqish darajasi pastligicha qolmoqda. Xalqaro standartlarni joriy etish cho‘zilmoqda, markazlarning metodologik ishlari sust.
2025-yil oxirigacha yangilangan klinik protokollar sonini ikki baravar oshirish rejalashtirilgan. Markazlarni boshqaruvga berish sog‘liqni saqlashga investitsiyalar va kadrlarni yanada ko‘proq jalb qilish uchun asos bo‘lishi mumkin.
