Nega bu muhim
Yengil sanoat O‘zbekistonning asosiy eksport qiluvchi kuchlaridan biri (to‘qimachilik, charm-poyabzal mahsulotlari, ipak, gilam). Yangi agentlik mexanizmi modernizatsiyani tezlashtirishi, ta’minot zanjiridagi tor joylarni yopishi va ishlab chiqaruvchilarni jahon bozorlariga olib chiqishi mumkin.
Agentlik nima qiladi
- to‘qimachilik, ipakchilik, charm-poyabzal va gilam to‘qish tarmoqlarida davlat siyosatini shakllantirish va amalga oshirish;
- korxonalarga aylanma mablag‘larni taqdim etish uchun $200 mln miqdoridagi jamg‘armani boshqarish (Tiklanish va taraqqiyot jamg‘armasidan bosqichma-bosqich ajratish);
- kadrlarni o‘qitish va eksport kontraktlarini sug‘urta qilish xarajatlarini qoplash uchun grantlar berish;
- xorijda savdo uylarini ochish, ofislar va omborxonalarni ijaraga olish, reklama xarajatlarining bir qismini qoplash;
- standartlarni joriy etish, sertifikatlashtirish, MHXSga o‘tishga ko‘maklashish;
- 2026-yil 1-iyulga qadar to‘qimachilik texnoparkida 24 turdagi sinovlarni o‘tkazish imkoniyatiga ega laboratoriya tashkil etilsin;
- moda industriyasi inkubatori — Fashion Business Incubator uchun 5 mlrd so‘m ajratish;
- marketing tadqiqotlari va ishlab chiqaruvchilarning tashqi bozorlarga chiqishiga ko‘maklashish, shu jumladan chet elda do‘konlar va savdo uylarini tashkil etishni qo‘llab-quvvatlash;
- Made in Uzbekistan tashabbusi bilan xorijiy brendlar va sorsing kompaniyalarni jalb qilish;
- ishlab chiqarishning yetishmayotgan bo‘g‘inlarini (matolarni bo‘yash, terini qayta ishlash, ipak mahsulotlari) mahalliylashtirishni va Turkiya, Xitoy, Yevropa Ittifoqidan korxonalarni ko‘chirishni rag‘batlantirish.
Mohiyat
Yangi organga investitsiyalar, sanoat va savdo vazirining sobiq birinchi o‘rinbosari Nozimjon Xolmurodov rahbarlik qilmoqda. Agentlikning tashkil etilishi prezident tomonidan 2025-yil avgust oyida e’lon qilingan edi.
Yengil sanoat uzoq vaqtdan beri eksport tushumlarini ko‘paytirish, ish o‘rinlarini yaratish va Made in Uzbekistan brendini mustahkamlash uchun O‘zbekistonning ustuvor yo‘nalishi bo‘lib kelgan. Tarmoqdagi muammolar qatoriga integratsiyalashgan zanjirlarning yetishmasligi, zaif logistika, standartlashtirish va xalqaro bozorlarga chiqish kiradi. Agentlik resurslarni jamlash, ekspertlarni qo‘llab-quvvatlash va tarmoq ishlab chiqaruvchilarini moliyalashtirish vositasiga aylanadi.
