Nega bu muhim
Litsenziya talablarining kuchaytirilishi kapital bozorining yanada barqaror va shaffof infratuzilmasini shakllantiradi. Sarmoya, boshqaruv va texnologiyalarga qo‘yiladigan talablarning oshishi investorlar uchun xatarlarni kamaytiradi va professional ishtirokchilarga bo‘lgan ishonchni oshiradi. Muddatsiz “tartibga solish qumdoni” rejimi uzoq muddatli rivojlanish va yangi moliyaviy yechimlarni sinab ko‘rish uchun sharoit yaratadi.
Nima bo‘ldi
- O‘zbekiston yetakchisi “tartibga solish qumdoni” maxsus huquqiy rejimi muddatsiz bo‘lishi va mamlakat rezidentlari uchun ochilishi to‘g‘risidagi hujjatni imzoladi.
- Farmon bilan qimmatli qog‘ozlar bozorining professional ishtirokchilari, shu jumladan investitsiya vositachilari, ishonchli boshqaruvchilar va investitsiya maslahatchilarini litsenziyalash talablari va shartlari tasdiqlandi.
- Amaldagi investitsiya vositachilari 2026-yil 1-iyulga qadar ustav kapitali va boshqa parametrlarni yangi talablarga muvofiqlashtirishi shart.
Raqamlar va faktlar
Litsenziyalanadigan kompaniyalar uchun ustav kapitalining eng kam miqdori quyidagicha belgilangan:
- 2026-yil 1-iyuldan — BHMning 3000 baravari (1,236 mlrd so‘m);
- 2027-yil 1-iyuldan — BHMning 4000 baravari (1,648 mlrd so‘m);
- 2028-yil 1-iyuldan — BHMning 6000 baravari (2,472 mlrd so‘m).
Shuningdek:
- Kasbiy faoliyatning bir necha turi qo‘shib olib borilganda eng kam ustav kapitali ularning soniga karrali miqdorda ko‘paytiriladi.
- Litsenziya talablari va shartlari 2026-yil 1-iyuldan kuchga kiradi.
Kompaniya rahbarlari
- Bozorning professional ishtirokchilari ustav kapitalining va boshqa moliyaviy ko‘rsatkichlarning yetarliligini ta’minlashi, shuningdek, Istiqbolli loyihalar milliy agentligi tomonidan belgilangan normativlarga rioya etishi shart.
- Shuningdek, noqonuniy daromadlarni legallashtirishga qarshi kurashish bo‘yicha qonunchilikka rioya etilishi ko‘zda tutilgan.
- Foydalaniladigan dasturiy ta’minot va texnik vositalar belgilangan talablarga javob berishi, o‘z ishlanmalaridan foydalanilganda esa mualliflik huquqi tasdiqlanishi lozim.
- Kompaniya rahbarlari sohaga oid oliy ma’lumotga va kamida ikki yillik ish stajiga ega bo‘lishi kerak.
- Rahbarlik lavozimlariga iqtisodiy jinoyati uchun sudlanganlik holati tugallanmagan shaxslar, shuningdek, litsenziyasi o‘z aybi bilan to‘xtatilganiga uch yildan kam bo‘lgan tashkilotlarning sobiq rahbarlari yoki ta’sischilari qo‘yilmaydi.
Mohiyat
- Kapital bozori yanada tartibga solingan va standartlashtirilgan muhitda ishlaydi.
- Professional ishtirokchilar kapital, boshqaruv va ichki tartib-qoidalarga qo‘yiladigan talablarni oshirishga oldindan tayyorgarlik ko‘rishlari kerak bo‘ladi.
- Yangi va faoliyat ko‘rsatayotgan kompaniyalar uchun bozorga kirish va ishlashning yagona qoidalari belgilanadi.
