Nega bu muhim
Sement mamlakatlar o‘rtasidagi savdoda asosiy tovarlardan biri hisoblanadi. Cheklovlar qo‘shnilar o‘rtasidagi munosabatlarni keskinlashtirishi va infratuzilma hamda uy-joy loyihalari faol amalga oshirilayotgan O‘zbekiston qurilish bozoriga ta’sir ko‘rsatishi mumkin.
Nima bo‘ldi
- QazCem assotsiatsiyasi rahbari Yerbol Akimbayevning Forbes Kazakhstan’ga ma’lum qilishicha, iyul oyida O‘zbekiston Vazirlar Mahkamasi go‘yoki sementning tonnasini 300 dollardan arzon import qilishni taqiqlovchi buyruq chiqargan.
- Qozog‘istondan yetkazib berishning o‘rtacha narxi ilgari 30 dollar atrofida edi.
- Qoida joriy etilgandan so‘ng, 2025-yil avgust oyida yetkazib berish hajmi 2018-yildan beri birinchi marta nolga tushdi.
- Akimbayevning ta’kidlashicha, hujjat e’lon qilinmagan: “Bizda faqat bojxonachi ekranining surati bor. Bu yetti muhr ortidagi sirdir”.
- Uning so‘zlariga ko‘ra, yuqori narx tufayli o‘zbekistonlik importchilar xarid qilishdan bosh tortgan.
- QazCem assotsiatsiyasi allaqachon O‘zbekiston importiga qarshi “ko‘zgu choralar”ni muhokama qilish uchun Sanoat va savdo vazirligi, Savdo vazirligi va QazIndustry`ga murojaat qilgan.
Mohiyat
2018-yildan buyon Qozog‘iston O‘zbekistonga sement yetkazib beruvchi eng yirik davlat hisoblanadi. O‘zbekistonning o‘zida so‘nggi yillarda 30 dan ortiq yangi sement zavodlari qurildi va soha ortiqcha ishlab chiqarishga duch keldi.
2024-2025-yillarda mamlakat ichki narxlar va quvvatlarni barqarorlashtirish uchun qurilish materiallarini mahalliylashtirishni faol qo‘llab-quvvatlamoqda va importni cheklamoqda. Ekspertlarning ta’kidlashicha, agar vaziyat diplomatik yo‘l bilan hal qilinmasa, ikkala tomon ham savdo javob choralariga o‘tishi mumkin.
