Nima uchun bu muhim:
Kompaniyaning tushuntirishi media maydonida noto‘g‘ri talqinlar to‘lqinini kuzatib bormoqda. HUMO ta’kidlashicha: token qat’iy ravishda O‘zbekiston qonunchiligi doirasida yaratiladi va texnologik hamda huquqiy jihatdan ishonchli vositadir.
Nima bo’ldi:
- HUMO HUMO Token maqomi haqida rasmiy izoh berdi.
- Loyiha O‘zbekiston Respublikasi qonunchiligi doirasida amalga oshirilayotgani, kripto-aktivlardan foydalanish bo‘yicha cheklovlarni buzmasligi ta’kidlandi.
- Token davlat obligatsiyalari bilan ta’minlangan va to‘lov infratuzilmasini rivojlantirishga qaratilgan.
- HUMO Tokendan boshqa yurisdiksiyalarda – mahalliy qoidalarga rioya qilgan holda foydalanish mumkin.
- Barcha operatsiyalar identifikatsiya, monitoring protseduralaridan o‘tadi va AML/KYC me’yorlariga mos keladi.
- Eslatib o‘tamiz, kriptoaktivlar O‘zbekistonda to‘lov vositasi hisoblanmaydi.
Nima deyishdi:
HUMO ta’kidlashicha, loyiha shaffoflik, huquqiy soflik va texnologik ishonchlilik tamoyillariga asoslanadi. HUMO Token — bu spekulyativ aktiv emas, balki tartibga solinadigan moliyaviy vositadir, — deya ta’kidlagan edi avvalroq HUMO.
Mohiyat:
Avvalroq Frank.uz HUMO Token O‘zbekistonda davlat obligatsiyalari bilan ta’minlangan va ILMA reyestrida ro‘yxatdan o‘tgan birinchi raqamli aktiv ekani haqida xabar bergandi. Emissiya va infratuzilmaga Asterium kripto depozitariysi xizmat ko‘rsatadi.
Platforma MDH va Osiyodagi hamkorlar bilan transchegaraviy hisob-kitoblarni kengaytirish istiqboli bilan sinov bosqichida.
