Nega bu muhim
O‘zbekistonda yagona ochiq onlayn reyestr paydo bo‘ladi, unda tadbirkorlar tovarlarni import, eksport va tranzit qilish bo‘yicha barcha tariflar va cheklovlarni bepul va real vaqt rejimida bilib olishlari mumkin bo‘ladi. Tadbirkorlar turli idoralarga murojaat qilmasdan, barcha cheklov va tariflarni bir joyning o‘zida tezkor tekshirishi mumkin bo‘ladi. Axborot yetishmasligi tufayli tovarlarni import va eksport qilishda xatolar xavfi kamayadi.
Nima bo‘ldi
- Vazirlar Mahkamasi tranzit orqali olib kiriladigan, olib chiqiladigan va olib o‘tiladigan tovarlarga qo‘yiladigan taqiqlar va cheklovlarning yagona elektron ochiq reyestrini joriy etish chora-tadbirlarini tasdiqladi.
- Cheklov va taqiqlar “Integratsiyalashgan tarif” interaktiv xizmati ma’lumotlari asosida shakllantiriladi.
- Yagona reyestrni yuritish “Integratsiyalashgan tarif” ma’lumotlar bazasiga yuklatilgan.
Raqamlar va faktlar
- G‘aznachilik qo‘mitasiga tarif va cheklovlarning to‘liq ro‘yxatini shakllantirish, “Yagona reyestr” onlayn bo‘limini bepul ishga tushirish, tizimdagi ma’lumotlarni muntazam yangilab borish va axborot xavfsizligini ta’minlash vazifasi qo‘yildi.
- Yagona reyestrni ishga tushirish — 2026-yil 1-yanvardan.
- Tariflar va cheklovlar ro‘yxatini shakllantirish muddati — 1 oy.
- Onlayn bo‘limni e’lon qilish muddati — 2 oy.
Mohiyat
- Yagona reyestr tashqi savdo faoliyatining shaffofligini oshirish va tadbirkorlarning O‘zbekiston bojxona chegarasi orqali tovarlarni olib o‘tishda amaldagi tariflar, taqiqlar va cheklovlar to‘g‘risidagi ma’lumotlardan foydalanishini soddalashtirish maqsadida yaratiladi.
- Bojxona va regulyatorlar faoliyatining shaffofligi oshiriladi.
- Tashqi iqtisodiy operatsiyalarni rejalashtirish tezlashadi va biznes xarajatlari kamayadi.
