Nega bu muhim
O‘zbekistonda urbanizatsiyaning jadallashuvi shahar infratuzilmasi va kommunal xizmatlarga bo‘lgan bosimni kuchaytirmoqda, bu esa aholining turmush sifati va biznes yuritish sharoitlariga bevosita ta’sir ko‘rsatmoqda. Suv, kanalizatsiya, transport va jamoat joylaridan foydalanish imkoniyatining yo‘qligi shaharlarning barqarorligi va iqtisodiy samaradorligini pasaytiradi. Jahon banki mablag‘larini jalb qilish ushbu muammolarni kompleks hal etish, iqlim va ijtimoiy xavf-xatarlarni hisobga olgan holda shaharlar rivojlanishining uzoq muddatli modelini shakllantirish imkonini beradi.
Nima bo‘ldi
- Jahon banki ijrochi direktorlar kengashi O‘zbekiston uchun 250 mln dollar miqdoridagi moliyalashtirish paketini ma’qulladi.
- Mablag‘lar LPCP dasturi doirasida mamlakatning 16 ta tuman va shahrida aholi va biznes uchun munitsipal infratuzilma va xizmatlarni rivojlantirishga yo‘naltiriladi.
- Jahon banki dasturi hukumat tomonidan 2025-yilda boshlangan hududlarni jadal kompleks rivojlantirish davlat dasturini amalga oshirishni qo‘llab-quvvatlaydi.
Raqamlar va faktlar
- O‘zbekistondagi 37 million aholining yarmidan ko‘pi shaharlarda istiqomat qiladi, 2050-yilga borib shahar aholisining ulushi 60 foizdan oshishi kutilmoqda.
- Davlat dasturi jami 3,6 mln aholi istiqomat qiladigan 16 ta strategik ahamiyatga ega tuman va shaharlarni qamrab olgan.
- LPCP dasturi mamlakatning 13 ta hududida, jumladan, Yangiyo‘l va Marg‘ilon shaharlarida, shuningdek, respublika bo‘ylab 14 ta tumanda amalga oshiriladi.
- 2030-yilga kelib, LPCP dasturi to‘g‘ridan-to‘g‘ri qariyb 1 million kishining turmush sharoitini yaxshilashga imkon beradi, bunda benefitsiarlarning yarmini ayollar tashkil etadi.
- Dastur doirasida 300 ming kishining transport xizmatlaridan foydalanish imkoniyatini yaxshilash, 400 ming aholi uchun jamoat joylari va bog‘larni rivojlantirish rejalashtirilgan.
- Infratuzilma loyihalarining amalga oshirilishi qurilish sohasida 10 mingga yaqin vaqtinchalik ish o‘rinlarini yaratish imkonini beradi.
Mohiyat
- LPCP dasturi hududlarni qo‘llab-quvvatlashning yangi modelini shakllantiradi, bunda mahalliy hokimiyat organlarini moliyalashtirish hajmi erishilgan natijalar va boshqaruv samaradorligiga bevosita bog‘liq bo‘ladi.
- Hududiy rejalashtirish va investitsiya rejalarini ishlab chiqishda mahalliy hokimiyat organlarining rolini kuchaytirish shahar muhiti sifatini va shaharlarning iqlim xatarlariga chidamliligini oshirishi kerak.
- Investitsiya rejalarini shakllantirishda fuqarolar va biznesning bevosita ishtiroki aholi ehtiyojlarini yanada aniqroq hisobga olish va mahalliy iqtisodiyotni rag‘batlantirish uchun sharoit yaratadi.
