Nega bu muhim
Sessiyada e’lon qilingan rejalar shuni ko‘rsatadiki, Jizzax viloyati keng ko‘lamli investitsiyalar va biznesni qo‘llab-quvvatlashning tizimli chora-tadbirlari bilan mamlakatning sanoat, qishloq xo‘jaligi va turizm o‘sishining asosiy markazlaridan biri sifatida qaraladi. Viloyat mahalliylashtirishni chuqurlashtirish, turdosh ishlab chiqarishlar zanjirini yaratish va eksport salohiyatini oshirish uchun rag‘batlantirilmoqda.
Nima bo‘ldi
- Shavkat Mirziyoyev Xalq deputatlari Jizzax viloyati kengashining navbatdan tashqari sessiyasida nutq so‘zladi.
- Prezident matbuot xizmati xabariga ko‘ra, viloyatda 12 milliard dollarlik 152 ta yirik investitsiya loyihasidan iborat portfel shakllantirilgan.
- Ularning amalga oshirilishi viloyatning iqtisodiy jozibadorligini sezilarli darajada oshirishi kerak.
- Prezidentimiz sanoatni rivojlantirish, investitsiyalar jalb etish bo‘yicha ham yangi tashabbuslarni ilgari surdi.
- 2026-yildan boshlab butlovchi qismlarni validatsiya qilish xarajatlarining 50 foizi Savdoni rivojlantirish kompaniyasi tomonidan qoplab beriladi.
Raqamlar va faktlar
- Tog‘, suv va yaylov hududlarini bog‘dorchilik va turizm bo‘yicha yangicha yondashuvlar asosida rivojlantirish, dasht va cho‘l yerlari ko‘p bo‘lgan hududlarni sanoatlashtirish mo‘ljallanmoqda.
- Sanoat zonalarida uchta direksiya negizida investorlarni qo‘llab-quvvatlash, marketing va loyihalarni tashkil etish bilan shug‘ullanadigan Yagona boshqaruv kompaniyasi tashkil etiladi.
- Kompaniyalarga sanoat zonalarida amalga oshiriladigan loyihalarda yerning bozor qiymatida ulush kiritish huquqi beriladi.
- Prezident Jizzax shahridagi Texnoparkda bo‘sh turgan 10 ming kvadrat metr maydonni ham tadbirkorlarga imtiyozli shartlarda taklif qildi.
- Shuningdek, Sharof Rashidov tumanidagi 118 gektarlik sanoat zonasining bo‘sh turgan hududida tayyor ishlab chiqarish binolarini qurish va yangi loyihalarni joylashtirish muhimligi ta’kidlandi.
Mohiyat
- So‘nggi yillarda Jizzax viloyati avtomobilsozlik, sanoat va qishloq xo‘jaligi tarmoqlariga yirik investitsiyalarni faol jalb qilmoqda.
- Davlat hududlarning raqobatbardoshligini oshirish uchun investorlarni qo‘llab-quvvatlash institutlarini kuchaytirmoqda, sanoat zonalarini rivojlantirmoqda va moliyaviy qo‘llab-quvvatlash mexanizmlarini joriy etmoqda.
- Biznes uchun xarajatlarni qisman qoplagan holda ishlab chiqarishni tayyor maydonlarga joylashtirish imkoniyatlari kengaytirilmoqda.
- Aholi uchun bu yangi ish o‘rinlari, hudud sanoatining jadal rivojlanishi demakdir.
